WILLEMSTAD.- Ayera nochi tempran AMAK a tene un rueda di prensa kaminda nan a duna atenshon na e último detayenan pa loke ta trata Festival di Tumba 2019.
E organisashon pa medio di su presidente, Sr. Manfred ‘Feco’ Gomes a duna informashon kaminda el a duna di konosé ku ounke e organisashon a enkontrá algun situashon ménos positivo pa loke ta e parti finansiero, nan no a logra di atraé sufisiente ‘brandingpartner’, pero ta informá ku miembronan por ta trankil pasó e direktiva a hasi su trabou i ta pendiente pa ofresé mundu kompletu un tremendo Festival di Tumba.
Feco tabata masha kontentu ku e kantidat di medionan di komunikashon ku a sostené e fecha di inskripshon. El a indiká si ku e kantidat di 57 tumba ku a inskribí ta ménos ku lokual nan a spera. Evaluando e partisipantenan, e presidente a indiká ku e kuerpo di hurado lo tin un trabou masha difísil.
Pa loke ta trata e kuerpo di hurado, tin algun kara nobo den e kuerpo di hurado, esaki pa hasi e hurado stabil.
No tin un desishon ainda riba e kantidat di tumberonan ku ta klasifiká pa final, konforme regla ta mitar dje kantidat ku a inskribí plùs 1, no por surpasá 30. Pa esaki direktiva tin ku kaba di diskutí e punto aki ku un komishon ku reunion general a instituí pa duna konseho na direktiva riba asuntunan di importansia pa ku Festival di Tumba.

Opservadó
Gino Genaro konforme desishon di reunion general lo asistí direktiva pa Festival di Tumba komo opservadó. Despues di Festival di Tumba lo e traha un relato, esaki ku e meta pa duna mas transparensia na e organisashon di Festival di Tumba.

Sound Check
Djadumingu awor lo tin sound check pa 8 or di anochi. E agrupashon musikal ONE Flavaz lo ta enkargá ku esaki. Públiko ta keda invitá pa bin wak kon stage a keda.

Stage
AMAK a duna enkargo na Massive pa nan atendé stage, zonido i lus. E stage a resultá un sorpresa agradabel. Pa e anochi final Feco a indiká ku lo tin algun kambio chikí i agradabel.
AMAK ta kontentu pa e gran kantidat di kolaboradó ku ta koperá ku e organisashon. For di tur skina ta haña yudansa chikí, loke sigur ta di aploudí.

BADGE
AMAK ta urgi tur músiko pa nan kaba di atendé nan badge. No warda te na último momentu pa atendé esaki.
Ofisina di Turismo ta yudando ku e promoshon internashonal. Informashon ku AMAK a risibí ta indiká ku tin interes pa nos tumba. Komo ehèmpel a duna di konosé ku tin hende ku for di Boston a kumpra karchi pa e festival.\
AMAK a informá tambe ku e refuersonan pa sekshon di Brass a yega for di Venezuela. E apoyo aki ta importante pa bin yuda e bandanan mantené e nivel musikal haltu.

SEGURIDAT
Gregory Gonzalez, miembro di direktiva enkargá ku relashon públiko a indiká ku un dje aspektonan importante pa AMAK ta e seguridat, tantu paden komo pafó. E infrastruktura di Festival Center ta bon pa seguridat, motibu pa kua pa AMAK ta masha importante pa garantisá seguridat  di tur hende ku ta drenta pa gosa.
Por último a pidi pa públiko por yega na ora pa evitá aglomerashon na porta.