WILLEMSTAD – AMAK a tuma nota di e reklamo di e kalidat di grabashon di e CD i AMAK a tuma kontakto ku esnan konserní i nan a komprondé di Sr. Gregg ku e CD nan ku ta saliendo awor aki e kalidat ta bon konforme e miksing di Sr. Ento Hooi.

Manera ta konosí tur aña, AMAK ta produsí un CD di e 12 número ku sali ku skor mas haltu. E grabashon di e CD ta na enkargo di Sr. Ento Hooi i Sr. Darwin Gregg ta enkargá ku distribushon di e CD i komo tal e ta paga un derecho pa por hasi esaki.

Ta bon pa menshoná aki tambe ku mirando ku kada aña mester trata na mehorá kualkier produkto di e festival, na aña 2015 AMAK a invertí un suma signifikante pa por disponé di un studio di grabashon, pa di e forma ei por duna mihó kalidat di CD.

E aña aki a surgi un problema kaminda e sekuensia di e CD no ta konforme e sekuensia di skor di hurado.

Ta a e motibu aki entrante otro aña AMAK lo anunsiá e sekuensia for di 12 te unu. Esaki ta pa evitá ku despues por tin konfushon espesialmente entre number 6 pa 10.

Sr. Gregg a pone 25 cd disponibel pa asina ei AMAK entrega na  finalistanan 1 te 12 ku por haña un kopia na e kalidat manera mester ta.

“AMAK ta pidi su diskulpa pa lokual a tuma lugá i nos lo tuma e medidanan sigur pa evitá ku den futuro algu asina por ripití. AMAK ta deseá tur músiko, felis dianan di karnaval i nos ta sigur ku nos músikonan lo bringa pueblo di Kòrsou ku bon músika, kaminda nos tumba lo resaltá.” Asina e komunikado di AMAK ta finalisá bisando.