WILLEMSTAD.- Manfred ‘Feco’ Gomes di AMAK a kuminsá pa gradisí Minister Camelia-Römer pa e rapides ku el a atendé e problema di molèster di zonido. ‘Ayera AMAK i Minister a kombersá i AMAK a tres puntonan dilanti pa loke ta trata e problemátika di no solamente e molèster di zonido, pero tambe di sitionan ku den pasado a keda será òf prohibí via di veredikto di korte pa por tin muzik bibu’. Di akuerdo di Feco, tin speransa ku ta yega na un areglo ku ta kumbiní tur dos parti i ku en berdat bo mester tene kuenta ku e lei di molèster di zonido. E ta kontentu tambe ku nunka no tabatin zonifikashon i ku aworakí lo e ta un dje puntonan pa diskutí riba dje. Gomes ta kere ku lo mester basha awa den biña pa loke ta trata e altura di desibèl. E ta kere ku funshonarionan di GMN huntu ku otro instansianan i AMAK por yega na un akuerdo kaminda e altura di desibèl lo ta un ku tur hende por biba kuné. ‘Nos pueblo tin su kultura i su kustumbernan. Nos ta kere ku tin espasio pa ban papia i pa nos ban wak tambe sitionan ku den pasado a stòp aktividatnan, sea via di un veredikto òf otro motibu. AMAK ta bai hasi un inventarisashon i ta spera di por yega na un posibel solushon’, asina Feco a indiká. Pa loke ta trata fiestanan di tambú, Polis, GMN huntu ku AMAK ta bai analisá kiko ta e motibunan ku a ninga pèrmit i wak ku si hasi sierto adaptashon aktividatnan por kontinuá na e sitionan. AMAK ta dispuesto pa laga su inspektornan yuda kontrolá kaminda tin ekseso di zonido i pa notifiká e músikonan ku nan a yega e límite di zonido permití. Segun Feco Gomes, e materia no ta fásil i ta kompliká. ‘Mi ta kere ku for di nan tur nos por siña i krea un maneho ku ta kuadra ku nos kultura, pero ku no ta stroba e trankilidat di e hendenan ku ta biba rònt di un sentro di dibertishon’, Feco a terminá bisando.