WILLEMSTAD.- Djasabra anochi un kantidat di yu di Kòrsou i estranheronan di vakashon na Kòrsou a disfrutá dje promé edishon di ‘Tabula Rasa’. Organisá riba terenonan di Santa Barbara Beach & Golf Resort kantu di awa na Fuik, for di bo yegada bo por a sinti mesora ku e ambiente tabata algu apart i íntimo.
E show su apertura a konsistí di presentashon di akrobatanan i hendenan kanando riba ‘stelten’. Dj-nan Salvatore Ganacci, Don Diablo i Freddy Moreira a presentá ku entre otro bailarinnan riba tarima i skupidonan di kandela.
Pa e anochi por tabata kompletu, e área di kuminda ku solamente empresanan lokal a sòru pa tur hende por a sisti e stoma bon.
Organisadonan, Sterck Events tabata masha kontentu ku nan por a krea pa Kòrsou un festival úniko ku un ambiente apart. E show a terminá masha bon mes i e públiko a sera konosí ku ‘Fuik Valley’, un área úniko na Santa Barbara Beach Resort. Riba foto algun imagen durante dje evento.