WILLEMSTAD.- Tokando e tema di piesanan ku loke na ingles ta ser yama ‘Explicit Lyrics’ òf bon bisá na papiamentu letranan ku palabra malu, ‘DEN E BEMBE’ a puntra Chucho Albertina kiko ta su opinion riba esaki pa ku e karera musikal di un artista urbano. ‘Bo no mester ta underground’, asina Chucho a kuminsá bisa. ‘In principe no, bo por ta super komersial i drai. Bo no mester ta underground pa bo tin hype i nan gusta bu riba kaya. Mi ta kere ku nan ta den nan ‘zone’, esei ta loke e hendenan gusta. Ora nan yega na e radio ku nan tin e muraya nan ta bai adaptá nan mes na esaki. Ami ta pro pa e vershon di radio. Fo’i ora e kantika sali e mester ta pa tur hende. Ami ta egt komersial. Si mi ta manehá un artista e mester ta pa tur hende. Mi no ke traha muzik restringí. Mi ke pa mi tanchi, mama, mi ruman tur gosa di dje, anto ya si e tin un tiki dòbel sintí, e ta den nos kultura’, asina Chucho a splika. E ta keda kere ku tur artista mester focus riba e merkado komersial. ‘Underground tei pa semper, bo ta traha bo muzik tira riba facebook, esei no ta hasi nada. Si bo ke ‘break’ ku un kantika òf ku un proyekto e mester ta egt mas amplio, sigur si bo ke biba di muzik’. Finalmente Chucho a splika ku bo tin hende ku ta hasi muzik pa hòbi, pero si bo ke biba di muzik i aki 5 aña bo ke tin bo kas i tin un outo ‘heavy’ dor dje talento ku bo tin, bo mester focus riba komersial.