WILLEMSTAD.- Despues di temporada di karnaval semper ta duna inisio na un trayekto interesante. Esaki ta e temporada fértil pa komposishonnan nobo i den trankilidat kada kantante ta apelá riba inspirashon tambe. ICONS no ta un eksepshon, sinembargo maneho di e banda a traha planifiká i por bisa ku tin diferente piesa pa subi merkado.
Amos Balentin ta e promé pa lansa un komposishon di Quincy ‘Biggie’ Comenencia areglá pa Dwight Leoneta. Ambos músiko, kompositor ya a traha anteriormente ku Amos ku a hasi e trayekto pa ‘Mi Kurpa Ta Pidi’ un mas fásil.
Hitnan anterior di e trio aki ta por ehèmpel ‘4 Muraya’. E kansion kombiná ku su video clip a keda estrená djamars último riba retnan sosial.
‘Mi Kurpa Ta Pidi’ ta un kansion ritmo kombiná romántiko ku ta papia di e klásiko diskushon interno entre mente, kurason i deseo.  Un kansion nèt pa e temporada aki. E videoclip produsí pa Greyan Pastor a keda grabá na Kòrsou konteniendo teknologianan avansá di produkshon i filmashon. E la keda estrená djamars anochi riba e kanal di YouTube di @decodedofficial i ya por bisa ku fanátikonan ta reakshonando masalmente.
‘Amoreusz’ a bin ta profilá tremendamente den ICONS i ta gradisí fanátikonan na Kòrsou, Aruba, Boneiru i Hulanda pa nan sosten. Ta invitá fanátikonan pa solisitá e kansion na nan radioemisora faborito. Follow the good vibes riba social media; Facebook/Instagram @iconscuracao / @amoreusz.balente