WILLEMSTAD-. Beisbòl lokal lo tin otro pelotero profeshonal pa loke ta trata sobra di e temporada aki. E pelotero profeshonal YDK Andrelton Simmons a firma algun ratu pasa ku e ekipo di Marchena Braves. Andrelton lo hunga sobra di e temporada. Si e ekipo di Marchena  yega postemporada, Simmons lo tei pa esaki tambe. Andrelton lo hunga pòrnada ku e ekipo di Marchena Braves. Esaki mirando ku e ta yudando e ekipo ku material i ta un di e spònsernan di e ekipo di Marchena.

Mènedjer di Marchena Braves Gilmar Velder ta kontentu di por konta ku Andrelton Simmons den e ekipo. Simmons lo trese su bon defensa pa asina sigurá nos defensa pa loke ta trata sobra di e temporada. Velder a siguí bisa ku e presensia di Simmons lo permití hasi ahuste den su defensa pa asina hasi esaki mas fuerte pa loke ta sobra di temporada. Lo mi kambia algun hungadó di posishon pa asina tin e mihó defensa posibel riba tereno Velder a siguí bisa.

E mènedjer di Marchena Braves a bisa ku Andrelton a pidi pa den weganan na Stadion di RIF, no pone komo shortstop. E ta preferá hunga segunda òf komo bateadó designa. Esaki mirando e mal estado di tereno na Stadion di RIF.

Andrelton Simmons luna pasa a keda laga den libertat pa e ekipo di Chicago Cubs. Simmons segun fuentenan serka di su persona lo tin plan pa hunga bèk den Liga Grandi próksimo temporada.

Simmons un veterano  di 11 temporada a hunga pa Atlanta Braves, Los Angeles Angels , Minnesota Twins i Chicago Cubs den su Liga Grandi. Simmons ta keda konsiderá komo un di e mihó shortstop nan di último añanan den Liga Grandi. Esaki mirando ku el a gana 4 wante di oro, “platinum glove” i un premio mihó hungadó defensivo di aña den su karera.