WILLEMSTAD.- Ku World Series tras di lomba, di forma ofisial e offseason di Major League Baseball a start, kuminsando ku e merkado di agente liber ku a habri djárason último. Entre e peloteronan ku ta subi e merkado ei, ta figurá e.o. Andrelton Simmons komo un dje 147 peloteronan di Major League ku ta bira liber. Mas pelotero lo djòin e grupo ei den próksimo dianan na momento ku ekiponan disidí pa no hasi opshon pa tene nan un aña mas.
Teknikamente, e prome sinku dianan di ‘free agency’ ta loke MLB ta referí komo “periodo ketu”, ora ku e agentenan liber no por firma ku un ekipo nobo.Den e dianan ei nan por bolbe firma ku nan ekipo bieu na kualke momento, i por negoshá ku otronan, pero no por firma kontrakt ku team nobo sino te djadumingu awor pa 2’or di atardi.

Djadumingu ta un dia importante pa Angels, ya ku por lo ménos nan tin ku hasi Simmons un ‘qualifying offer’. Esaki lo ta kontrakt di un aña na rason di 18.9 mion dollar, ku ta keda determiná for di un averahe di e 125 salarionan mas haltu di MLB e temporada ku a kaba. E deadline pa Angels hasi un oferta ta djadumingu awor 2’or pm, i e deadline pa e pelotero aseptá ta djabièrnè 6 di novèmber.
Den kaso ku Simmons, rechasá, kualke otro team ku firm’e lo pèrdè un ‘draft pick’ (posibilidat pa skohe un pelotero nobo) i Angels lo risibí un kompensashon pa ‘draft pick’, dependiendo di su kontrakt. Den kaso ku e aseptá, Angels lo tin ku paga Simmons di 31 aña 18.9 mion dollar den 2021 i aki e diskushon ta bai sinta.... ta trata di un pelotero ku a pèrdè hopi wega pa motibu di leshon.
Simmons a sinta banki durante di 53 wega den 2019 pa motibu di leshon na dos diferente parti di su enkel robes, pa despues bolbe pèrdè 22 partido den 2020 ku leshon na enkel drechi. E ta un dje miho peloteronan defensivo na momento ku e ta gosa di bon salú, pero e abilidat pa keda salú ta importante ora ku ta konsiderá pa hasi un ‘qualifying offer’. Pues sigur un situashon interesante pa e yu di Korsou.

KU FOTO