E pelotero a nenga di vakuná

MINNESOTA.- Shortstop di Minnesota Twins Andrelton Simmons, a tèst positivo pa Coronavirus i ayera nan a poné riba lista di peloteronan ku no ta disponibel. E shortstop yu di Kòrsou anteriormente a duna di konosé ku e no tin intenshon pa tuma e vakuna, ku tabata disponibel siman pasá djaweps na Target Field.
Presidente di asuntunan di beisbòl di Twins, Derek Falvey, a duna di konosé ku Simmons tin algun síntoma no serio i e ta sosegando na kas. E resultado positivo di tèst a drenta djamars lat, despues ku Twins a sufri derota kontra di Red Sox,
Simmons a keda remplasá riba roster pa JT Riddle, kende nan a yama for di un training spesial dje ekipo.
Twins a tene un reunion pa rekordá tur su hungadónan komo tambe staff pa tene nan mes na e protokòlnan di vírus, ounke ku mayoria di nan a keda vakuná. Pero e periodo durante kua nan por ta ‘safe’ kompleto ainda no a yega.
Falvey a duna di konosé ku ainda e problema no ta tras di lomba. “Awor ta e momento pa nos ta mas kuidadoso posibel”.
Simmons luna pasá a tweet bisa ku lo e no tuma e vakuna i ku esei ta pa “motibunan personal i eksperensia di pasado”, pero a nenga di bai den detaye. Djadumingu último el a konfirmá di no a partisipá den e grupo grandi di Twins ku a tuma e vakuna. Puntrá si e tin pensá pa tuma e vakuna den futuro, el a bisa di no sa.
Di parti di Twins, Farley a bisa “nos ke sigui eduká e hendenan. E kos aki ta serio. “Mayoria biaha nos no sa kon sierto kos ta pasa. Nos sa ku nos mester ta kuidadoso no solamente den nos deporte, sino den tur deporte i rònt Merka i mundu. Nos pensamentu ta ku konstantemente mester rekordá tur hende ku ta bon idea pa tuma e vakuna.Nos dòkternan a rekomendá esei, i komo tal nos lo sigui duna nos peloteronan e posibilidat ei, esta pa nan siña mas tantu posibel di e kos aki”.

KU FOTO
...Andrelton Simmons...