WILLEMSTAD.- Nòmber di peloteronan den Major League Baseball ta skeiru bai bin di un ekipo pa otro. Ku peloteronan yu di Kòrsou esei no ta un eksepshon, i ayera a aparesé un artíkulo ku ta menshoná e posibilidat ku shortstop Andrelton Simmons lo ta un bon kandidato pa remplasá LeMahieu serka New York Yankees.
Simmons (31) a hasi su debut den MLB na edat di 22 aña serka Atlanta Braves. Den su promé temporada kompleto, el a gana Gold Glove i Platinum Glove, i a posishoná su mes entre e 15 kandidatonan pa MVP. Simmons a gana otro Gold Glove den su di dos temporada ku Atlanta. El a keda te 2015 ku Braves promé ku a bende su kontrakt ku Los Angeles Angels na komienso di temporada 2016.
Ku Angels el a kaba den Top-15 di votashon MVP i a gana dos Wante di Oro mas. Den su karera di nuebe aña, Simmons a bati pa averahe di .269 ku .696 OPS i 91 OPS+.
Simmons lo ta un bon remplasante di LeMahieu pa algun motibu. Un di nan ta ku Yankees por haña Simmons pa ménos sèn kompará ku LeMahieu. Simmons lo firma pa maksimal US$ 10 mion, komo un batidó averahe ku defensa élite.
Un otro bentaha dor di firma Simmons ta ku esei lo habri kaminda pa Gleyber Torres bai 2da base, despues di a tambaliá hopi defensivamente komo shortstop.
Ideal lo ta pa Yankees firma DJ LeMahieu pa un aña. Pero den kaso ku no logra esei, firmando Andrelton Simmons lo ta un bon alternativa.