Ningun pelotero a keda eligí e aña’ki

WILLEMSTAD.- E veterano centerfielder di MLB Andruw Jones, a mira un kresementu bastante grandi den kantidat di voto ku el a risibí pa por drenta Hall of Fame. E yu di Kòrsou a subi for di 19.4% den 2020 pa 33.9% den 2021 i ainda por aparesé den próksimo seis votashon.
Ayera a klousura e votashon pa Hall of Fame 2021 i remarkabel ta ku pa promé biaha for di 2013, ningun pelotero a risibí e 75% di voto nesesario pa por drenta e salon di figuranan grandi di beisbòl Liga Grandi. Curt Schilling tabata esun mas serka, ku 71.% di voto riba su nòmber.
Schilling, sinembargo, for di ayera a anunsiá ku e no ta deseá di ta kandidato den 2022. Ku otro palabra, despues ku na nuebe okashon e no a risibí sufisiente kantidat di voto, e no ta interesá pa drenta den su di dies oportunidat siendo ku e aña’ki el a yega hopi serka.
A puntra 4 periodista di ESPN pa nan menshoná e sorpresa i desapuntonan di mas grandi dje votashon dje aña’ki. Komo e ganadó mas grandi sin a haña e nominashon ainda nan ta menshoná Andruw Jones ku a krese for di apénas 7.5% den 2019 pa 33.9% den 2021, i ketu bai e tin seis aña pa keda eligí. Nan ta asentuá ku e ta entre e mihó centerfieldernan defensivo di tur tempu, den su ‘prime’ e tabata bati riba averahe i su kantidat di homerun di 434 ta yama atenshon.
Pa loke ta trata desapunto, tin un kantidat, entre kua Bonds, Clemens i Schilling. Tur tres otro aña lo tin nan delaster oportunidat. Pero djis despues ku e resultado a keda anunsiá, Schilling a skirbi riba Facebook di no ta deseá di ta kandidato den 2022. Den kaso ku Schilling, Bonds i Clemens no drenta otro aña, nan posibilidat pa Hall of Fame lo pasa pa e Komité di Veteranonan, kendenan ta reuní kada sierto kantidat di aña pa konsiderá e peloteronan ku no a keda skohé pa periodistanan di beisbòl.