WILLEMSTAD.- Andruw Jones den fin di siman último a risibí otro rekonosimentu na Merka, na momento ku e estado di Georgia a introdusié den “Georgia Sports Hall of Fame”. E eks-pelotero yu di Kòrsou a forma parti di un grupo di ocho veterano di deporte kendenan a risibí e máksimo rekonosementu deportivo dje siudat durante di un anochi di gala den Macon City Auditorium.

A referí na Andruw Jones komo un yu di Kòrsou kende ya na edat di 16 aña a kuminsá sobresalí den e organisashon di Atlanta Braves. El a risibí e ‘call’ di Braves den 1996 na edat di 19 aña. Seguidamente ta hasi menshon dje echo ku el a hunga 12 temporada na Atlanta, tambe ku na sinku okashon el a forma parti di ekipo All-Star i ku durante e añanan ei el a gana 10 Wante di Oro.

Jones su aña di mas éksito, di akuerdo ku e relato, tabata  2005 den kua el a liderá Liga Nashonal den kantidat di RBIi homerun i a risibí e “NL Hank Aaron Award” komo e mihó ’offensive’ player den liga.

Den 2007 Andruw Jones a risibí “Fielding Bible Award” komo e mihó centerfielder den MLB. Seguidamente el a hunga pa kuater otro ekipo di MLB promé ku el a finalisá su karera hungando na Hapon. Andruw tambe a keda indusí den Braves Hall of Fame den 2016.