WILLEMSTAD.- Ayera a hasi anunsio ku momento a yega pa miembronan di Baseball Writers’ Association of America (BBWAA) kuminsá vota pa skohe figuranan di Major League Baseball pa drenta Hall of Fame 2021. Kada kandidato tin un máksimo di 10 aña di tempu pa keda eligí, i entre nan ta figurá Andruw Jones ku ta bai pa su di 4 elekshon.

Nòmbernan manera Torri Hunter, Tim Hudson, Mark Buehrle i Barry Zito lo aparesé pa promé biaha. Pero tambe lo topa ku nòmber di Curt Schilling, Roger Clemens i Barry Bonds –tur tres pa di 9x- komo kandidato. Ultimo kuater aña 13 eks-pelotero a risibí sufisiente voto pa drenta e salon. E votadónan di BBWAA tin te fin di aña pa depositá nan voto, miéntras ku e resultado lo bira konosí dia 26 di yanüari 2021.

Un hungadó su nòmber mester aparesé riba por lo ménos 75% di e papelnan di votashon pa drenta Hall of Fame, di kua e seremonia lo tuma lugá 25 di yüli na Cooperstown, NY. E grupo di 2020 ku Derek Jeter, Larry Walker, Ted Simmons i Marvin Miller (dfm) tambe lo keda ofisialisá e dia ei, despues ku e seremonia di 2020 a keda posponé debí na e pandemia di Coronavirus.

Kada pelotero ta eligibel pa 10 aña. Aña pasá tabatin 397 papel di votashon ku a keda entregá, loke a trese kuné ku kada kandidato tabatin mester di 298 pa keda eligí. E nòmbernan ku pa promé biaha lo aparesé, ta: Mark Buehrle, A.J. Burnett, Michael Cuddyer, Dan Haren, LaTroy Hawkins, Tim Hudson, Tori Hunter, Aramis Ramirez, Nick Swisher, Shane Victorino i Barry Zito.

Un pelotero tin mester di sosten di por lo ménos 5% di voto pa por keda den ‘running’ p’e siguiente aña.

E siguiente 14 peloteronan lo regresá riba e lista di 2021:

(nòmber, kantidat di aña komo kandidato, total di voto i porsentahe)

Curt Schilling, 9th (278, 70.0%)

Roger Clemens, 9th (242, 61.0%)

Barry Bonds, 9th (241, 60.7%)

Omar Vizquel, 4th (209, 52.6%)

Scott Rolen, 4th (140, 35.3%)

Billy Wagner, 6th (126, 31.7%)

Gary Sheffield, 7th (121, 30.5%)

Todd Helton, 3rd (116, 29.2%)

Manny Ramirez, 5th (112, 28.2%)

Jeff Kent, 8th (109, 27.5%)

Andruw Jones, 4th (77, 19.4%)

Sammy Sosa, 9th (55, 13.9%)

Andy Pettitte, 3rd (45, 11.3%)

Bobby Abreu, 2nd (22, 5.5%)

Andruw Jones

Andruw Jones den su promé dos añanan a risibí bou di 7.5% di voto i den 2019 a subi te na 7.5%. E veterano centerfielder den su karera a bati pa averahe di .254 ku 434 homerun i .823 OPS den 17 temporada di MLB, durante kua el a gana 10 Gold Glove Award, hasi 5 aparishon den All-Star i a gana Hank Aaron Award den 2005, aña den kua el a finalisá na di dos puesto (tras di Albert Pujols) pa MVP Award di Liga Nashonal. Solamente 5 otro pelotero a yega di gana 10 òf mas Gold Gloves, kual nan ta Ichiro Suzuki i e kuater siguiente Hall of Famers: Willie Mays, Roberto Clemente, Al Kaline i Ken Griffey Jr.