WILLEMSTAD.- Ya pa 40 aña kaba grupo Angelitos a sa di brinda nos Kòrsou, prinsipalmente esnan di mas chikí ku kansionnan edukativo. E wikènt ku a pasa Angelitos a selebrá su 40 aña den forma di un show 3 dia largu.
E show '4-T-Fun-Tastic' a keda presentá pa e Angelitosnan aktual i tambe e eks-Angelitosnan ku durante añanan anterior a trese kansionnan ku a dal pega duru manera: ‘E trùk di mi tata’ kompañá originalmente pa Boy Thode, 'Obedesé', 'Kokada' i hopi otro éksito mas.
Diferente ta e eks-Angelitosnan ku a bini for di Hulanda pa forma parti di e selebrashon aki, huntu ku e lider di tur tempu 'Tante Ruthie'. Durante di e simannan ku a pasa rekuerdonan dushi i inolvidabel a keda menshoná dor di e eks miembronan. Por ehèmpel e 6 biahanan en total i e 3 wikèntnan tras di otro ku nan a bai duna show na Aruba den añanan anterior huntu ku 'Pierewietje', 'Ni Fu Ni Fa' pero tambe ku 'Salserin'.
E grupo Angelitos no a keda djis na un kor so, pero el a krese i bira un skol di músika bou di guia di Tante Ruthie. Mayoria miembro di e grupo por toka un òf mas instrumènt i durante e dianan di show por a tende e miembronan aki toka ‘live’ tambe. Netamente pa e motibu aki entre otro tante Ruthie a keda rekonosé pa su trabou meritorio desplegá riba tereno musikal, spesial kanto koral hubenil.
Grupo Angelitos kompletu ke yama un danki na henter pueblo di Kòrsou ku tur e añanan a duna nan sosten i apoyo na e grupo. Un danki di kurason na Tante Ruthie pa tur e amor i dedikashon ku semper el a hinka den formashon musikal na tur e muchanan den nos komunidat. Dios bendishon'é pa e sigui ku e bon trabou ku semper el a hasi. Kanta Angelitos... Kanta pa Kòrsou tende bo!