WILLEMSTAD.- Muchanan di Koro di Mucha Angelitos, ta preparando ku hopi entusiasmo pa nan tremendo konsierto hubenil  "Christmas is for Love" ku lo tuma lugá djadumingu dia 16 di desèmber na Teatro Norman de Palm.
Un konsierto úniko pa grandi i chikí, ku kanto, músika, baile i komedia.
Bo ta kanta kantika di Pasku, bo ta gosa, bo ta hari hopi ku nos muchanan talentoso, ku Papa Pasku i su èlf nan.
Durante di e último añanan, Angelitos a logra  duna su kantantenan oportunidat pa bou di guia di dosentenan profeshonal siña toka instrumèntnan musikal . Nos hóbennan talentoso a ekspandé nan habilidatnan musikal tokando riba e instrumèntnan manera piano, guitara, kuarta, flùit, konga, drùmsèt i mas instrumèntnan di perkushon.
Lo tin diferente ensemble, ku ta grupito di 2 tokadó hubenil òf mas, ku lo presentá bunita kansionnan di Pasku riba nan instrumènt.
E banda di teeners nobo ku yama ‘VoiceMailBand’, tambe lo hasi su debut e dia aki.  Tambe lo tin presentashon di e tremendo grupo di Baile "The Stars Dancers"
Angelitos ta pèrkurá pa un formashon sosial basá riba disiplina, norma i balornan. Esaki ta pèrkurá pa un desaroyo aún mas positivo di nan komportashon, aktitut i sentido di disiplina.
Nos ta warda tur mucha i hende grandi dia 16 di desèmber na Teater Norman de Palm, ántes Teatro Luna Blou. Angelitos ta presentá e konsierto dos biaha, di 2 or di mèrdia pa 4 or di atardi i di 5 or di atardi pa 7 or di anochi.
Karchi ta optenibel na Mensing's Caminada i serka tur miembro di Angelitos, VoiceMailBand i Framily Youth Orchestra.
Pa mas informashon òf pedido di karchi por manda un e-mail na Ruthieangelitos@gmail.com  òf un WhatsApp na number +5999 511 8160