WILLEMSTAD.- Djabièrnè 20 di aprel último Curaçao Beverage Bottling Company, Coca-Cola (CBBC) den estrecho koperashon ku Curaçao Internatonal Film Festival Rotterdam(CIFFR) a organisá un anochi edukativo i festivo na parke Himno i Bandera na Barber, spesialmente pa e komunidat di Bándabou.
Esaki den kuadro di selebrashon 80 aniversario di CBBC Kòrsou.
Tabata un anochi sumamente eksitoso kaminda públiko por a disfrutá di e “short film” titulá “Juni” kreá pa hóbennan di Joseph Civilis i produsí pa IBB. Tambe a presentá  e pelíkula ‘Respeto’ ku ta ilustrá bida di un hóben yama Hendrix den e mundu di “underground rap”.
E anochi tabata yená ku un programashon edukativo di entre otro un ‘flashmob’ ku binti bailarinanan, kues i kompetensia di rap. Pa duna e anochi e toke festivo públiko por a disfrutá di presentashon di Chaika i pa klousurá un “afterparty” di Dj Ramil.
Segun Myrthe George, Sales i Marketing Manager na CBBC: “Nos di CBBC ta sumamente kontentu di por selebrá nos di 80 aniversario i pa e oportunidat di por a traha konhuntamente ku CIFFR pa regalá komunidat di Bándabou e bunita opsekio aki. Keda pendiente pasó di pariba pa pabou nos selebrashon ta sigui rònt Kòrsou!”