MERKA.- E legendario pianista i kantante Antoine ‘Fats’ Domino, konsiderá un dje tatanan di ‘Rock and Roll’ den dékada 1950 i 1960 a fayesé ku 89 aña na New Orleans.
Domino outor di éksitonan manera ‘Blueberry Hill’ i ‘Ain’t That a Shame’ a bende mas ku 65 mion di disko durante di su karera musikal i a risibí un Grammy na 1987 pa su trayektoria musikal.
Durante di dékada 1950, Domino a enkabesá e lista di Top musikal na Merka ku su ‘rhythm and blues’ i ta solamente Elvis Presley por a super’é.
‘The Fat Man’, komponé huntu ku Dave Bartholemew na 1949 ta e promé disko di ‘rock and roll’ ku a bende mas di 1 mion di disko.
Su komposishonnan a marka un époka kaminda músikonan manera Presley, John Lennon i Paul Mc Cartney tabatin Domino komo un di nan prinsipal influensianan.
Domino tabata un dje promé músikonan ku a keda indusí den e ‘Salon di Fama di Rock & Roll’ na 1986, den un grupo ku tabatin tambe Chuck Berry, Buddy Holly i James Brown.