WILLEMSTAD.- Ku hopi orguyo organisashon ta anunsiá e programa di e di 4 edishon di Curaçao International BlueSeas Festival. E Festival grátis, ku ta tuma lugá den kayanan di Pietermaai, ta riba djabièrnè 19 i djasabra 20 di aprel.
E aña aki un biaha mas ku un elenko di talento di Blues riba e diferente stagenan. Pa mas informashon di e programa i orario kompleto, bo por subi e wèpsait: www.curacaoblueseasfestival.com

Davina and The Vagabonds manera e kuminsá e ta hinka e públiko den su saku. For di momento ku a forma e banda di Blues, ku e fenomenal Davina Lozier komo kantante, e banda a logra éksito mundial den un tempu rekòr, ku un meks di blues, New Orleans Jazz kontemporeano i diferente otro género di músika.
Eric Gales no ta simplemente un bon guitarista: nan ta konsider’é komo héroe riba e seis snarnan ei, dor di personanan ku por sa, manera: Joe Bonamassa i Carlos Santana. Na edat di 4 aña e la siña toka guitara serka su rumannan mayó i a siña por ehèmpel imitando diferente piesa di Jimi Hendrix. Den 2017 e la saka su último albùm Middle Of The Road. Esei ta su di 15 disko i ei riba e ta toka huntu ku artistanan invitá, manera Gary Clark Jr. i Lauryn Hill.
Guitarista Solomon Hicks a haña e apodo ‘King’ pa su meskla kasi perfekto di jaszz i blues, i na edat  hóben. Solomon ta den su binti i algu aña, pero e la kuminsá ku 13 aña den e famoso klup “Cotton Club” den New York, komo guitarista prinsipal i lider di un banda di 13 músiko.
Despues di a kuminsá na edat basta yòn ku aktuashon, Shakura S’Aida rápidamente a traha su nòmber den farándula kanades. Awor aki e ta un veterano ku mas di 30 aña di eksperensia, kaminda el a yega di aktua ku diferente artista internashonal, entre otro komo back-up vocal pa Patti La Belle.

Sharrie Williams a kuminsá kanta na edat di seis aña den un kor i na momento ku e la bira 12 aña, ya e la graba i a hasi diferente gira. Despues di tempu e la djòin un banda Wiseguys i no a dura mashá ku nan a kambia e banda den Sharrie Williams & The Wiseguys. Williams ta konosí pa su bos bas ku kua e ta kanta vershonnan úniko di Blues, kombiná ku Gòspel i rock.
Nick Moss ta konosí pa su dominio di guitara i su piesanan di Soul. E ta un Soulman original i a perfekshoná su aktuashon ku presentashonnan den klup di blues den Chicago. Despues di a aktua ku i yuda diferente artista Moss a forma su propio banda na 1997 i den 2018 su disko, The High Cost Of Low Living, ta sali i aki tambe e ta haña kompañamentu di e famoso músiko di sinfonia di boka, Dennis Grueling.
Nan a deskubrí kantante di Louisiana Robert Finley na edat kaminda otronan ta baha ku penshun. E persona prinsipal di Black Keys, Dan Auerbach a mira un video di Finley su aktuashon riba kaya i mes ora a firma Kinley pa su propio seyo; e resultado ta e disko Goin’ Platinum! di 2017. Riba e disko aki tin su piesanan di bluesrock, kargá ku soul i algu di gòspel.
Kantante i saksofonista Vanessa Collier a kuminsá su karera tempu e ta tin 9 aña i a deskubrí blues dos aña despues, tokando un komposishon di blues. E tin dos grado di Berklee College of Music i na 2014 Collier ta saka su promé disko Heart Soul & Saxophone. E la sigui e debut aki ku su di dos disko Meeting My Shadow den 2017 i Honey Up ku ta su disko mas resien.

Curaçao International BlueSeas Festival ta un inisiativa di Fundashon Bon Intenshon produsí pa Mojo Concerts.