WILLEMSTAD.- E dia a yega, awe nochi lo tin e apertura di Carnival Village, Kleine Werf, pa loke ta trata temporada di Karnaval 2019.
Pa e apertura Fundashon JAG a kontratá e banda legendario Kassav pa un presentashon na Kòrsou. E konsierto di awe nochi lo konta ku presentashon di Orkesta Vega, Gentz i Icons by Gio den antesala.
Ayera tardi lat i anochi e músikonan di Kassav a yega Kòrsou ku buelo for di Ulanda i St. Maarten. Manera ta konosí algun dje músikonan ta residensia na Fransia i sobra ta residensia na Martinique.
Den un reakshon kòrtiku e músikonan di Kassav a indiká di ta kontentu pa por bolbe presentá na Kòrsou i ku pa awe nochi e públiko por ta sigur ku ta nan klásikonan lo bai zona.
Karchinan pa awe nochi a bende hopi bon i organisashon tin espektativa ku nan lo kanta ‘Sold Out’. Riba foto nos por apresiá momentu di yegada di e músikonan di Kassav ayera nochi na airport.