WILLEMSTAD.- Apertura di Carnival Village 2020 lo tuma lugá ku un tremendo konsierto. Esei a bira konosí ayera tardi durante di un rueda di prensa organisá pa Fundashon JAG ku a duna detaye dje evento.
Juni Aniceta, presidente di Fundashon JAG, e organisadónan di Karnaval 2020 a informá ku nan ta sumamente kontentu di por a logra hinka un tremendo konsierto den otro pa e apertura di Carnival Village ku lo tuma lugá dia 4 di yanüari 2020 i ku e aña aki lo ta na Curaçao Festival Center.
Pa e konsierto e organisashon tin kontratá: GIO, Gentz, Kevin Little, Dongo, Ir-Sais i for di Barbados e popular agrupashon musikal, Krosfyah.
KARCHI
Entrante awe karchinan lo ta na benta na Mensing’s Caminada, 24 uur uit de muur, ofisinanan di Pagafasil ‘Tu y Yo’ i serka gruponan di Karnaval. Karchinan den pre benta lo kosta 55 florin i despues lo bira 65 florin. Na porta karchi lo kosta 75 florin.
Gruponan di Karnaval ku yuda kontribuí ku benta di karchi lo risibí komishon for di esaki. Meta dje konsierto ta pa rekoudá fondo pa yuda gruponan pa hasi Karnaval mas grandi i pa yuda gruponan pa para riba nan pia.

OFERTA
Awe, djaluna 23 di desèmber 2019, lo tin un ‘gimmick’ kaminda lo bende karchinan pa e konsierto entre 5 or di atardi pa 6.30pm na rason di 45 florin. Pa esaki tin un kantidat limitá di karchi. Benta di karchi ‘gimmick’ lo tuma lugá na sede di Fundashon JAG ku ta na Roosevelt Center.
Kòrsou prepará bu pa djasabra 4 di yanüari 2020 bo bai Carnival Village i disfrutá di un tremendo konsierto ku GIO, Gentz, Kevin Little, Dongo, Ir-Sais i Krosfyah!.