WILLEMSTAD.- Djabièrnè 04 yanüari próksimo lo tin apertura ofisial di Karnaval 2019 ku un jump up/ jump in di nos hóbennan ku ta e relevonan di nos karnaval.
Esaki lo kuminsá pa 6’or di atardi en punto for di Samira Building riba F.D. Rooseveltweg i terminá na Sambil. Aki lo bai tin diskurso di nos Minister sra. Marilyn Alcalá-Wallé, Presidente di Fundashon J.A.G. sr. Hubert “Juni” Aniceta, Pastor Curtis tambe lo hiba palabra.
Despues lo tin presentashon di nos Rei di Tumba Hubenil Gian van Eiker i nos Rei di Tumba grandi Urwin Jano, ku nan tumba nan ganadó di 2018. Presentashon di un banda musikal sorpresa pa por jump un ratu kontentu na Sambil.
Pa finalisá lo bai tin un tremendo shou di vürwèrk presentá pa Gustavo Semeleer.
Asina aki Fundashon J.A.G. ta hasi e apertura pa e dushi temporada di Karnaval 2019, e fiesta kultural mas grandi na Kòrsou.