WILLEMSTAD.- Karnaval 2020 tei ranka sali awe tardi 6 or ku e apertura di Karnaval 2020 ku un tremendo jump up. Ayera ‘DEN E BEMBE’ a kombersá ku Juni Aniceta kende ta realmente entusiasmá ku e temporada di Karnaval 2020.
Pa awe nochi nan tei konopá kabuya bieu na kabuya nobo, nan tei mustra e hóbennan kon tabata selebrá Karnaval ántes ku un jump saliendo for di Plasa Mundu Merced te ku stadion di SUBT.
Animashon lo ta na enkargo di stilbènt, brasbènt, dj i ERA.
Gruponan Hubenil i Tiner huntu ku embahadornan di Karnaval a keda invitá pa partisipá na e jump up di apertura. Públiko tambe por partisipá kumprando nan karchi pa jump i despues drenta stadion di SUBT.
Ora ku yega Stadion di SUBT lo tin e parti ofisial kaminda Minister di Kultura lo hiba palabra. Un dje sorpresanan durante dje evento den Stadion di SUBT lo ta presentashon di ‘Brass Revolution’, e brasbènt forma pa músikonan ku ántes a studia na Universidat di Antia. Aserka ta pendiente tambe pa mas animashon musikal durante dje ‘jump in’ den stadion.
Karchi pa por partisipá na e jump up i despues ta bo entrada tambe pa e jump in ta kosta 15 florin i ta optenibel na sede di Fundashon JAG ku ta situá na Roosevelt Center.