WILLEMSTAD.- Djaweps atardi na Sentro Kultural Kòrsou a tuma lugá e apertura di e eksposishon ‘Ka’i Òrgel Miniatura’.
E eksposishon ta un proyekto di Sentro Kultural Kòrsou konhuntamente ku Sentro di Detenshon i Korekshon Kòrsou. E ka’i òrgel miniatura a keda traha pa klientenan di SDKK i a keda eksponé den Ouditorio di Sentro Kultural Kòrsou.
Pa e apertura di e eksposishon a hiba palabra Minister di Kultura, Sra. Alcala-Wallé, Minister di Hustisia, Sr. Girigorie, representante di SDKK i Presidente di Sentro Kultural Kòrsou, Sr. Cornelia.
Riba potrètnan por tuma nota di algun di obranan di ka’i òrgel miniatura i tambe momentu ku a kòrta sinta pa ofisialmente habri e eksposishon.