WILLEMSTAD.- Fundashon Karnaval di Banda Bou, den persona di Rignald Maduro a informá ku a trese un kambio den nan kalènder di Karnaval 2020, no ta habri Karnaval riba e djadumingu despues ku JAG. Fundashon Karnaval di Bándabou lo ta huntu ku JAG riba tantu 3 i 4 di yanüari, dia 5 tin un aktividat grandi na Fuik, loke a pone ku a skùif e apertura di Bándabou pa dia 12 di yanüari, tumando na konsiderashon ku nan apertura tambe lo ta na laman.
Manera Rignald a bisa ‘Laman ta trese kosnan bon!’.
Rignald a informá tambe riba e desishon ku lo tin elekshon di embahadornan di Bándabou. ‘Ta un Karnaval tin, nos tin e marcha ku ta e diferensia, e embahadornan ta di Kòrsou. Loke si nos a kumbiní ta ku den e elekshon di Pariba, bo ta saka un representante ku lo representá Bándabou. JAG su elekshon ta dediká na bario.
SKOL
E karnaval di Skolnan ya tin konfirmashon di 8 skol ku a komprometé ku nan ta partisipá. E idea ta pa yega te na máksimo 12 skol pa e marcha ta responsabel.
POSITIVO
Un punto positivo ku a resaltá pa loke ta Marcha di Bándabou ta e interes di gruponan di Bándabou. ‘Tin algun ku ya kaba a presentá nan trahe ku nan lo partisipá kuné. Un satisfakshon pa tuma nota ku tin mas grupo ta bai nase for di Bándabou. Tin algun grupo ku ainda ta tambaliando, pero den e dianan ku ta bini nan lo konfirmá na partisipashon na Karnaval’, asina Rignald a informá.
Finalmente Rignald a bolbe informá ku nan tin algu reto i ku tur hende ku tin ku kumpli kuné nan ta bai kumpli ku nan. ‘Nos ta bai kumpli ku tur hende. Ora bo ta fiesta bo mester ta kontentu, bo no por ta rabiá!’.