WILLEMSTAD.- Apertura di temporada di Karnaval 2020 ta inisiá ku un tremendo jump up dia 3 di yanüari 2020, asina Juni Aniceta, presidente di Fundashon JAG a informá ayera tardi.
Pa selebrashon dje apertura di Karnaval 2020 a skohe pa ban rekordá pasado. Ban rekordá kon ántes Karnaval tabata pasa brùg bai Punda, Pietermaai, Penstraat i sigui pa ML King Boulevard.
E Jump up di dia 3 di yanüari lo konta ku animashon musikal di brasbènt, stilbènt, dj Kleine i ERA ku lo ta e banda pa animá durante jump up.
Pa 15 florin bo por kumpra bo karchi i partisipá na e jump up ku lo kuminsá na Waaigat i bai terminá na vèlt di SUBT na Kintjan. Einan lo tin e parti di protokòl ku palabranan di Minister di Kultura i un sorpresa musikal.
Fundashon JAG a invitá tur e gruponan hubenil i tiner pa partisipá na e jump up i naturalmente ta konta ku partisipashon di pueblo di Kòrsou.