WILLEMSTAD.- Apertura di temporada di Karnaval 2018 lo tuma lugá riba djasabra 6 di yanüari 2018 riba Kleine Werf na Skalo. Fundashon JAG, enkargá ku organisashon di Karnaval a pone e organisashon dje apertura di Karnaval den man di Archel Calister i su crew. Pa temporada di Karnaval 2018 lo kombertí Kleine Werf den un ‘Carnival Village’ i pa e apertura lo tin dos stage kaminda músika lo keda presentá. E promé stage lo ta un ‘Road Fire’ stage kaminda lo tin presentashon di Gentz, ONe, Dreams, ERA, Hype, Gio, Score, Dolce i Vega. Ta e intenshon ku riba e dia aki tur e agrupashonnan musikal partisipante lo presentá un roadfire i pa final dje anochi un hurado lo skohe un ‘Roadfire King of Queen’ pa 2018. E di dos stage lo ta un ‘Urban Stage’ kaminda lo tin presentashon di artistanan urbano manera Dopeboy, Mula B, Dongo, Jaido, Gamaliel, Urbana, Sento, Jay T i lo tin algun presentashon di sorpresa. Kleine Werf lo tin su ‘foodcourt’, cocktail bar i un chill area. Karchi entrada ta optenibel na Teatro Luna Blou, Mensing’s Caminada, Beep Beep, Sede di FKBB na Barber, 24 uur uit de muur, Pompstation Sta. Maria, serka gruponan di Karnaval i ‘online’ via www.caribbeanticketshop.com E evento di apertura di Karnaval lo kuminsá pa 6’or di atardi i terminá 3’or di mardugá.