Update: E proseso pa duna barionan koriente bèk ta kompleho. E sistema por bolbe kai afó atrobe. “E situashon ta frágil, pero nos a bolbe kuminsá duna koriente na algun área. Nos ta konsiente di e impakto ku esaki tin riba nos tur su dia. Nos ta trahando duru ku e koutela nesesario pa por duna tur koriente bèk.” Ta informá tambe ku ya algun bario a kuminsá haña koriente bek.

==

WILLEMSTAD – Aqualectra a emití un informashon ofisial den kual ta duna di konosé ku e blackout di awe tabata un situashon ku a surgi abrupto i e promé prioridat di téknikonan ta pa por resolvé esaki mas lihé posibel i konektá Kòrsou bèk.

“Nos a kuminsá duna barionan koriente poko poko atrobe. Tanten ku nos ta trahando pa tur kas i negoshi tin koriente bèk, nos ke pidi djis un tiki pasenshi pa nos por duna e informashon di e situashon mas detayá i kompletu posibel. Pareu ku e téknikonan ta trahando, nos ta purbando di kompilá tur informashon nesesario di moda ku nos por duna un ‘update’.  Asina ku nos tin mas informashon, nos lo sòru pa kompartí esaki.” Miéntras tantu un di e barionan ku por konfirmá ku a haña koriente bek ta Mundu Nobo. Miéntras tantu den Mundu Nobo e koriente a bolbe bai.