WILLEMSTAD.- Awe mainta EXTRA a publiká ku Dutch Caribbean Air Navigation Service Provider (DC-ANSP) a disidí pa suspendé tur servisio di tráfiko aéreo di e kompania di aviashon Arajet. E kompania aki ta bula for di Sto. Domingo pa Kòrsou. E desishon di DC-ANSP ta entrante 11 di aprel último i e ta konta pa tur avion di e kompania dominikano aki. EXTRA tabatin kontakto ku representante di Arajet i el a splika ku e pago tabata hasi (promé ku e fecha aki sigur) pero ta un mal komunikashon tabatin.

Siman pasa dia 4 di aprel DC-ANSP a manda un atvertensia pa e kompania Arajet relashoná ku nan pagonan i a indiká ku si no paga nan lo stòpnan entrante 11 di aprel. E kompania a reakshoná mesora, ya ku tur pago tabata hasi.

Segun EXTRA a komprondé Arajet ta paga su tarifanan di buelo for di sèptèmber 2022 ora nan a kuminsá bula pa Kòrsou. Sinembargo tabatin un kambio adishonal di tarifa di airopuerto ku a drenta na vigor i e resibu di esaki tabata bai separadamente i no pa e kuenta kaminda pagonan tabata keda hasi.

Arajet mesora (4 aprel) a revisá e liñanan di komunikashon ku DC-ANSP i a tuma e medidanan nesesario pa prevení e fayonan aki den futuro.

DC- ANSP a hala aden e karta kaminda nan a informá ku si e kompania no paga  lo stòpnan di bula entrante 11 di aprel. Arajet ta sigui ku su buelonan i manera e bosero di e kompania a bisa EXTRA nan ta sigui ku buelonan ku tarifa abou riba e ruta di Kòrsou i Repúblika Dominikana.