BUENOS AIRES, AP.- Argentina a ofisialisá un rekompensa di 4,8 mion dòler pa esun ku duna dato útil riba ubikashon di e supmarino ARA San Juan. Esaki a pèrdè desde novèmber den Atlántiko Sur ku 44 tripulante na bordo.
E anunsio di Ministerio di Defensa di gobièrnu di Mauricio Macri, publiká den Boletin Ofisial, ta duna pèrmit pa empresanan privá partisipá den e operashon di búskeda ku aktualmente ta wòrdu ehersé pa Armada Argentina ku kolaborashon di embarkashonnan i teknologia di Rusia.
“Esaki ta nesesario pa brinda un respuesta na e sosiedat inkluyendo e famianan di nos kompatriotanan tripulante di e supmarino ARA San Juan riba loke a pasa i e destino di e embarkashon”, asina Ministerio di Defensa a indiká.
E gobièrnu a indiká siman pasá ku esaki lo ofresé un rekompensa pa datonan ku ta sòru pa lokalisashon di e supmarino despues di un reunion entre famianan di e tripulantenan di Macri.
E supmarino diesel eléktriko klase TR-1700 di fabrikashon aleman i den operashon desde añanan 80, a pèrdè riba 15 di novèmber na momentu ku esaki tabata nabegá desde Ushuaia, den ekstremo sur di Argentina. E tabata dirigiendo pa su base na Mar del Plata, despues di a partisipá den un ehersisio.
E sobrebibensia di e tripulantenan a wòrdu deskartá.
