WILLEMSTAD.- Djaluna awor, 4 sèptèmber Arnell i su Orkesta lo selebrá 30 aña den farándula di Kòrsou i esaki nan kier selebr’é ku nan pueblo ku a bin ta sostené nan. Huntu ku e selebrashon aki nan kier kompartí ku sra. Mafalda Minguel tambe a kumpli dia 11 yüni, 63 aña den farándula di Kòrsou.

Durante di e rueda di prensa ayera tardi na Because nos por a komprondé ku Arnell a selebrá 42 aña, Sherman 45 i Carlos ta bai selebrá 40 aña den farándula. Ta un selebrashon grandi lo bai tin sigur pa ku e okashonnan aki.

E piesa “Mango”,  komponé pa sr. Virgilio Sillie 30 aña pasa a bira un hit tantu lokal komo internashonal. Un piesa ku a logra di subi riba Billboard na Merka i keda ei riba pa tres siman. Arnell Salsbach a hasi menshon ku e nòmber Arnell i su Orkesta ta un idea di Mocky Job.

Djadumingu, 3 sèptèmber lo bai tin un selebrashon pa Kòrsou, grátis na Hòfi Fidel. For di 12’or di mèrdia te ku 8’or di anochi. Lo bai tin animashon di Arnell i su Orkesta i huntu ku nan pa animá e tremendo selebrashon aki Típiko Pasa Bon, Kaha di Orgel di Winchi Martha, Dj Chio, Karimbo, SP, XD i hopi sorpresa mas.

Lo bai tin un kushina i bar hopi bon surti. Famia Salsbach i tur e músikonan di Arnel i su Orkesta ta warda boso pa asina bin selebrá ku nan na Hòfi Fidel djadumingu awor, 3 di sèptèmber.