WILLEMSTAD.- Proyekto Internashonal Art Rules Curaçao ta Selebrá su promé lustro! E proyekto ta bin bèk pa su di 5 edishon dia 23 di yüli pa 4 di ougùstùs, 2018 na sentro kultural Kura di Arte den Pietermaai. Art Rules Curaçao a keda krese i desaroyá for di 2014. Pa e edishon di selebrashon, Art Rules ta trese un tim di artistanan for di eksterior pa duna workshop den diferente disiplina di arte i lo bai re-introdusí Mural Arts! E tim di Art Rules ta orguyoso ku e re-introdukshon di Mural Arts. Studiantenan ta haña oportunidat pa traha riba un obra di arte den e bario di Skalo Abou, e kapital kreativo di Kòrsou. Nan obra lo tin un lugá permanente huntu ku esnan di otro artistanan lokal i internashonal. E dosente di Mural Arts ta un artista i concept designer ku un klientela amplio ku ta inkluí un di e markanan mas grandi na mundu. ARC 5, a transformá e workshop popular di DJ den Beats Making & Music Production. Hopi di nos studiantenan ya a tuma e ruta di produkshon di músika kaba. Tin ku asta ta trahando ku artistanan lokal i internashonal. Ta na su lugá ku ARC ta fasilitá nesesidat di e hóbennan dor di trese produktornan ku ta vèrsá riba e materia pa inspirá i eduká riba e tereno tan gustá. Sobra disiplinanan ku ARC ta ofresé e aña aki ta: Music & Performance, Creative Writing, Creative Media, Dance, i Theater. ARC5 tin 150 lugá pa hóbennan por partisipá. Fundashon The Pancake Gallery, fundadó i produktor di Art Rules, a selektá un par di nòmber grandi pa duna lès e aña aki. E artistanan ta bini for di lugánan manera New York, Amsterdam, Suráfrika i Kabo Verde. Klaro ku tin dos artista di Kòrsou ku lo kompletá e tim great di artistanan dosente pa 2018. Art Rules Curaçao ta ofresé hóbennan un oportunidat pa desaroyá nan mes artístikamente. Nan ta haña oportunidat pa showcase nan trabou pa públiko dia 4 di ougùstùs na Kurá di Arte. Segun tradishon, ARC lo bai organisá un Open Dance Event na Riffort Village. E organisashon ta konmemorá su promé lustro ku un simposio tokante e tema di Arte i Edukashon. E simposio titulá Art Talk, lo krea espasio pa organisashonnan kultural i sosial bini huntu i start un kombersashon riba e tema kon abo por yuda bo komunidat por medio di arte. The Pancake Gallery ta sumamente kontentu di bin bèk pa e di 5 edishon di Art Rules. ARC5 ta invitá tur hóben entre 13 pa 24 aña pa apliká riba e wèpsait www.artrules.org. Si bo tin un talento spesífiko, ke deskubrí bo talento, òf si bo konosé un hende ku talento, inskribí bo mes libremente. Art Rules no ta rekerí un nivel avansá òf eksperensia artístiko pa por partisipá. E programa ta habrí pa un i tur ku e ambishon pa ta the best you can be, e mihó abo! Hasi lihé i inskribí! Pa mas informashon bishita e wèpsait artrules.org i sigui Art Rules via e medionan sosial: Instagram @artrulesflicks | Snapchat @artrulesnap | Facebook @artrulescuracao | Twitter @artrulesU. Art Rules ta warda boso 23 di yüli awor!