WILLEMSTAD.- Djárason otro siman, 4 di desèmber 2019 Uniarte ta presentá ‘Artist Talk ku Felix de Rooy i Vernon Chatlein na Cartagenastraat # 18 na Otrobanda.
E evento ku ta kuminsá pa 7.30 di anochi lo terminá 10 or di anochi.
Durante dje evento Felix de Rooy i Vernon Chatlein lo kombersá riba nan karera artístiko i e proyekto ‘Papia’ ku aktualmente ta keda presentá na Kòrsou.
Felix de Rooy, ta un artista visual, poeta, eskritor, sineasta, direktor di teatro i curator. Vernon Chatlein ta un perkushonista ku preparashon den músika Afro Kubano, músika Latino i Jazz. Huntu nan a traha den e proyekto di ‘Papia’.
De Rooy di su parti lo bai traha riba un proyekto nobo na Museo Nashonal di Kòrsou i tambe prepará e seremonia d apertura pa ‘The Cathedral of Thorns’ ku den luna di febrüari 2020 lo keda presentá na Landhuis Bloemhof.
Chatlein tin plania pa keda Kòrsou pa algun luna kaminda lo e bai hasi un investigashon riba músika i vários instrumènt tradishonal di Kòrsou i kombertí esaki den músika kontemporáneo. E proyekto aki ta keda finansiá pa ‘Fonds Cultuur Participatie’.