WILLEMSTAD.- E duo dinámiko Menasa ku MC Don T lo bai marka historia un biaha mas na Bèlgika riba 28 di yüli próksimo durante un di e festival nan di “dance” di mas grandi na mundu ku ta Tomorrowland ku mas ku 300.000 (2017) bishitante ku ta bini di tur huki na mundu.
Aña pasá e duo aki a debutá na Tomorrowland na Boom, Bèlgika. Nan a hasi esaki ku hopi éksito. E personanan ku a presensiá nan show a gosa hopi. Tambe Menasa ku MC Don T a waya e bandera di Kòrsou orguyosamente riba tarima i lógikamente riba tur medionan sosial. Esaki ta nifiká hopi promoshon pa nos isla den eksterior.
E aña aki nan lo presentá durante ‘prime time’ ku ta nifiká ku mas persona lo presensiá nan show. Tin di indiká ku nos Ofisina di Turismo, Curaçao Tourist Board ta un di e gran patrosinadónan di e presentashon di Menasa i MC Don T.