MERKA.- Ounke el a gana 10 Grammy Awards i ser konsiderá komo un dje mihó trompetistanan di mundu, Arturo Sandoval ta sigui sigurá ku e ta sigui entregá su mes na músika ku mesun intensidat manera e tabata hasié ántes.
Ta pa e motibu ei mes el a disidí di graba un produkshon musikal titulá ‘Ultimate Duets’ den kua el a traha ku algun dje mihó eksponentenan di músika aktual, for di Prince Royce te ku Pharrel Williams i Ariana Grande.
‘Ma traha un lista di mas o ménos 20 nòmber di artistanan ku mi ta atmirá pero ku ta kanta diferente género, mi a manda un invitashon i e proménan ku a kontestá ta esnan ku ta riba e albùm aki’, asina Sandoval a splika.
E promé sorpresa riba e albùm ta un duo ku e bachatero, Prince Royce, ku kende el a graba e tema “ Don’t You Worry About a Thing” ku Stevie Wonder a popularisá den dékada 70. ‘Tabata masha agradabel pa traha ku Prince Royce, e ta un hóben talentoso i ku tin un gran bos, pero mas ku tur kos e ta masha trankil. Nos a pasa hopi bon den studio di grabashon, manera bo por mira riba e video ku a keda produsí’, asina Sandoval a informá.
Otro dje kansionnan ku ta forma parti dje proyekto musikal ta ‘Corazón Partío’ ku Alejandro Sanz, ‘Granada’ ku Plácido Domingo, La Bilirrubina’ ku Juan Luis Guerra i ‘Quimbara’ ku Celia Cruz. ‘Tabata masha emoshonante pa inkluí algu ku Celia, semper ma atmir’é. Mi no por a produsí un álbum di duo sin inkluí e reina eterno di Salsa. Sandoval a sigurá ku nunka lo e bandoná e género di Jazz.