Turista a muri den tráfiko na Aruba

ORANJESTAD.- Sentral di polis na Aruba a haña notifikashon, den oranan di mardugá di djasabra pa djadumingu, di un aksidente basta serio ku a tuma lugá riba e riba kaminda pa Westpunt. Tabata 03:27 ku e yamada a drenta serka polis di e kaso. Mesora a manda un patruya pa e sitio i einan e promé patruya ku a yega a topa ku un outo Hyundai Accent shinishi numerá V-1236 di kua e shofùr tabata gravemente herida. Mesora e patruya a pidi asistensia di ambulans i tambe e vehíkulo di reskate di brantwer. Na yegada di ambulans nan a purba yuda e víktima, pero lamentablemente nan no por a hasi nada mas debí na e situashon grave di e shofùr. Dr. Texier ku a yega na e sitio a konstatá morto di e turista maskulino Eden Shimoniy 04:15. E hòmber ta nasé na Israel 21 di yüni 1992.

Spesialista den tráfiko tambe a presentá na e sitio pa hasi su investigashon, meskos ta konta pa polis tékniko i finalmente ‘slachtofferhulp’ pa duna asistensia na e famia den e momentunan difísil. Ku esaki Aruba a registrá su di 9 morto di tráfiko pa loke ta trata 2018.