ORANJESTAD.-Polis di Aruba ta informá di un aksidente serio ku a tuma luga awe mainta, mas o menos 9:15, riba e kaminda prinsipal di retonde na pos chikitu bai abou.  Manera indiká ta trata di un aksidente serio kaminda un vehíkulo a alkansá un peaton.

Despues di risibí e prome informashon, mesora sentral di polis a manda patruya di polis na e sitio, pa despues sigui ku ambulans, spesialistanan di trafiko i Slachtofferhulp. Na yegada di e promé unidat di polis nan a topa ku un hende hòmber riba kaminda, pero e no tabata reakashoná.

Ambulans ku a yega na e sitio a brinda asistensia médiko na e viktima, pero no por a hasi nada mas pa e víktima. Pa 10:30 dokter di polis a konstatá morto di Raimundo Alfonso Koolman 23-01-1959 Aruba (66 aña). Forsa na famianan.