ORANJESTAD.-For di Kuerpo Polisial di Aruba a drenta e informashon ku na Aruba a registrá e di 10 morto den tráfiko pa 2024. Ta trata un kaso ku a tuma lugá den oranan tempran di awe mainta, pa mas ménos 04:50 di mainta, ku sentral di polis a haña notifikashon di un aksidente di tráfiko hopi serio ku a tuma lugá na e rotònde na Bushiri.

Mesora sentral di polis a manda patruya i tambe ambulans na e sitio. Na yegada polisnan a bin topa ku un outo Nissan Tiida, kolo kora i ku number A-79008. E shofùr no tabata reakshoná. A pidi yudansa di rescuewagen di bomberonan, mirando ku e shofùr a keda pegá den e outo. E personal di brantwer a logra saka e víktima for di e situashon pa despues paramedikonan brinda asistensia médiko, pero lamentablemente no por a hasi muchu mas pa e víktima.

Tantu spesialista di tráfiko, deportamentu di slachtofferhulp, i dòkter forénsiko Voskuil tabata presente na e sitio. Dr. Voskuil a konstatá morto di Yonathan Ysaac Campos, nase 2 di ougùstùs 1976 na Venezuela. Kuerpo Polisial ta manda palabranan di kondolensia na famia di e defuntu.