‘No laga niun hende gaña bu ku ta bai kita COHO”

ORANJESTAD.-Premier di Aruba Evelyn Wever-Croes a tira un bista bèk kon luna aprel i mei a desaroyá pa loke ta trata turismo. E premier arubano a duna di konosé ku anteriormente Aruba a firma e agènda di ehekushon pa di dos kuartal i awor ta trahando riba esun pa e di tres kuartal. Tur e palabrashonnan ku Aruba a hasi ku Ulanda ta pa término largu, anto den e agènda di ehekushon ta partié den vários pida indikando kua ta bai promé. Tur esaki ta nesesario pa e sosten di likides ku Aruba tin mester pa e di 3 kuartal di e aña aki.

Aprel tabata un bon luna pa turismo di Aruba i meskos esei ta mustrando pa mei. Te ku aprel Aruba ta registrando rekuperashon di 50% kaba. Esei ta hopi bon, pero e no ta 100% ainda! Pues mester sigui dependé di e sosten di likides di Ulanda.

Aruba tambe, meskos ku Kòrsou i Sint Maarten ta den deliberashon ku Ulanda riba dos trayekto, esta e landspakket i e agènda di ehekushon pa e di tres kuartal di 2021, na di dos lugá tin e leinan di COHO ku mester kana via di leinan di konsenso. Mas aleu e premier arubano a bisa ku apesar ku su Gobièrnu ta demishonario nan ta sigui traha.

Landspakket ta un palabrashon pa término largu i sosten di likides ta algu ku Aruba tin mester di dje, sea ku un Gobièrnu ku ta demishonario òf no. Entrante 1 yuli Aruba tin mester di e sosten di likides, pues no tin opshon pa laga e negosiashon ku Ulanda kai.

Wever-Croes a hasi e komparashon ku e situashon na Kòrsou i Sint Maarten. Den ámbos kaso e ta mira kon Ulanda ta pone preshon riba e dos paisnan indikando ku si no sinta na mesa ku Ulanda lo no kumpli ku sosten di likides. Na Aruba nan aserkamentu ta diferente pa loke ta trata Ulanda. Aruba ta konsiente ku ta nan a bai bati na porta di Ulanda pa haña fiansa i nan a haña e fiansa na 0%. Nan ta sigui na mesa di negosiashon pa papia riba e kondishonnan. No ta tur kondishon nan ta di akuerdo kuné, pero nan ta sigui na mesa buska un solushon pasobra al final ta pueblo di Aruba ta sufri.

Wever-Croes a alerta pueblo di Aruba, awor ku ta bini elekshon pa no permití pa niun polítiko tira santu den nan wowo kontando chiste i bisando ku ta bai kita COHO. Aruba no ta baha kabes i aseptá tur kos.