Grupo di hende a aglomerá rondó di polisnan ku ménos bon intenshon

ORANJESTAD.- Polisnan na Aruba ta den un lucha tenas kontra poseshon di arma di kandela ilegal. Awe, djamars mainta e unidat K-9 a bai hasi detenshon di un sospechoso ku ta buská pa hustisia. Outoridatnan a bai Kaya Sint Maarten pa e detenshon, pero e sospechoso a resistí fuertemente te ku polisnan mester a los tiru di atvertensia. Echo ta ku e sospechoso tabatin un arma di kandela den su poder i no kier a koperá ku su detenshon.

E kaso a haña un buèlta diferente na momentu ku a parse ku algun hende a kuminsá aglomerá rondó di e polisnan, ku loke tabata parse ku ménos bon intenshon. Mirando e urgensia i peliger di e situashon e agentenan a los tiru di atvertensia. Esei a pone ku e situashon a kalma i despues a logra bui e sospechoso i bai kuné.

A pidi refuerso i mesora vários unidat mas a yega na e sitio. Na e sitio polis a hasi detenshon tambe di un otro hòmber ku tambe ta buská pa hustisia. Bosero di polis Liliana Rasmijn ta bisa ku e kuerpo ta sigui traha di forma inkansa-bel pa kita arma di kandela for di kaya. Den e kuadro ei ta hasi apelashon na e poblashon pa yama ‘tiplijn’ di polis 11141.

Otro arma

Algun dia promé tambe polisnan tabata den persekushon di un hòmber tur na pretu bistí, ku kara tapa, riba un skuter. E kaso ta ku sentral di polis di San Nicolas a haña notifikashon, djadumingu anochi, di un hòmber ku ta aktua sospechoso den e besindario di De Vuyst. Hendenan a mira ku e hòmber tabata kore ku kara tapá. Mesora polisnan a bai den e direkshon i a kuminsá buska. No a dura muchu ku na altura di Lago Heights supermarket un patruya a topa ku e hòmber riba skuter. A dun’é òrdu pa para, pero e no a sigui òrdu di polis. A kuminsá un persekushon.

Na altura di e krusada Mount Scenerystraat i ronde klipweg e skuter a drenta e kaminda di tera i na dado momento e shofùr a dal abou for di e skuter. E shofùr a kuminsá kore pa polis. Polis na pia su tras a mira con e sospechoso ta tira un opheto den e mondi. Ta resultá ku ta un arma di kandela. E hòmber a kore bai laga polis. A konfiská e arma i skuter. E investigashon ta sigui.