ORANJESTAD.- Minister Dangui Oduber ta lamentá profundamente ku websitenan di notisia arubano a publiká e informashon tokante di un alerta emití pa e instansia merikano Center for Disease Control (CDC).  Na opinion di e minister arubano, di e forma aki ta menasa e úniko pila ekonómiko di Aruba i ta krea pániko innesesario relashoná ku Zika.

Relashoná ku e informe ku EXTRA Online a publiká den wikènt, kaminda a inkluí e link di CDC, e minister ta bisa ku el a keda asombrá djasabra atardi ora ku el a tuma nota di e publikashon. E minister ta indiká ku ta trata di informashon inkorekto ku CDC a publiká riba Aruba. Sinembargo den mesun rosea e mandatario arubano ta indiká ku e notisia ta bèrdat i ku e asosashon di turismo arubano ATA ta dunando informashon na CDC pa asina Aruba ta transparente riba desaroyonan rondó di Zika. E minister ta bisa tambe ku e notisia no ta nobo, den sentido ku ta for di fin di 2016 ku tabatin e “outbreak” di Zika ku CDC a traha un lista di tur e paisnan na mundu unda Zika ta sirkulá. Tur pais/isla ku tabatin Zika a wòrdu poné ariba e lista aki pa seguridat di hende muhernan na estado.

Zika a bira endémiko na tur e paisnan aki, esaki kiermen ku zika ta keda sirkulá una bes introdusí na e pais. Kiko e paisnan aki mester apliká ta prevenshon. Pues duna tur e informashonnan nesesario na e biahero (den e kaso) relashoná ku e situashon di Zika. Pero tambe duna e informashon aki relashoná kasonan di zika na e organisashonnan.

Na 2016 y te na mitar di 2017 DVG a keda manda informashon na ATA riba e situashon di Zika pa asina informa e turistanan riba esaki. E informashon aki ta importante pa e keda aktivo, asina e biahero por wak ku tin akshon ta wòrdu tuma pa evitá ku e biahero por wòrdu infektá ku e vírus. Tambe ta eksistí un programa ku e hotèlnan pa nan ta liber di brote di sangura. Aruba no ta den ningun situashon di epidemia òf alerta pa ku Zika.

Turismo a krese

A.T.A. lo kontinuá ku esfuersonan pa komuniká desaroyonan debidamente na bishitantenan komo tambe sosionan den turismo. Ademas, ta bon pa remarká ku no opstante e outbreak na 2016 y djei kontinuashon di e fenómeno aki, den sektor di turismo e impakto a ser mitiga y turismo di Merka –mirando ku ta papiando aki di CDC ku ta un órgano Merikano- a krese ku 10.6% na 2017 y ta kresiendo ku 7.4% te ku awó.

E informashon publiká pa CDC unda ta duna e impreshon aki no ta kuadra ku realidat.  Aktualmente Ministerio di Salubridat Públiko ta den kombersashon ku e ekspertonan di e programa World Musquito Program pa bini ku mihó formanan pa prevení e tipo di  brotenan aki. Esaki ta e link pa e website di CDC: https://wwwnc.cdc.gov/travel/destinations/traveler/none/aruba