Polis ta pidi pa no stür bou di influensia ni ku selular den man

ORANJESTAD.-Kuerpo Polisial di Aruba ta informá ku un ratu pasa, pa mas o ménos 11:30 am sentral di polis a haña notifikashon di un aksidente ku a tuma lugá na Santa Cruz, na altura di e brùg ‘canashito’. Tantu polis komo ambulans a bai mesora na e sitio menshoná.

Na e sitio polisnan a bin topa ku dos vehíkulo embolbí den e aksidente. Ta trata di un Hyundai Getz koló kòrá, ku segun informashonnan a bai kore riba direkshon kontrali i a dal frontal kontra un outo GMC koló blanku. Ambulans a hasi lo máksimo pa yuda e víktima di e Hyundai, pero no a logra. Dr. Voskuil a presentá na e sitio i a konstatá morto di e señora Sandra  V. Growell nase na Aruba dia 4 desèmber 1962 (62). Esaki ta keda registrá komo e di 13 morto den tráfiko di Aruba.

Polis forénsiko, Slachtofferhulp i spesialistanan di tráfiko huntu ku hefe di tráfiko i Alto Komisario di polis tabata presente na e sitio. E investigashon ta den man di departamento di tráfiko. Polis ta hasi un súplika na tur outomobilista pa sigui reglanan di tráfiko, no stür bou di influensia i tampoko kore outo ku selular den man. Forsa na famia dje defuntu.