ORANJESTAD.-Polis di Aruba ta informá, ku un persona ku tabata embolbí den un aksidente di tráfiko djadumingu 8 di yüni, a fayesé. Ta trata di un aksidente di tráfiko ku a sosodé e djadumingu menshoná pa mas o ménos 12:25 mèrdia, na altura di Today supermarket na Cura Cabai. Un outo a alkansá un peaton. Ta trata di un outo di marka Kia, modelo Sonet kolo shinishi ku tabata riba e kaminda menshoná, bayendo direkshon abou.

Sentral di Polis a dirigí unidatnan di San Nicolas, tráfiko i ambulans na e sitio. E peaton a keda gravemente herida i a keda transportá ku urgensia pa hospital.

E víktima a lucha vários dia pa su salu, pero awe mardugá a drenta e notisia ku e peaton a fayesé. Dòkter a konstatá morto di e hòmber Michael Gerard Hector nase 3 desèmber 1972 na Aruba.

E kaso lamentabel aki ta bou investigashon pa Departamento di tráfiko. kuerpo Polisial Aruba ta manda palabranan di kondolensia pa e famia di e víktima.