ORANJESTAD - Ta confirma cu e variante di Covid19, Omicron tin Aruba den su gara. Un conteo realisa a base di datonan suministra pa Crisis Team, mester bisa cu ta bayendo pa 6 dia caba cu tin mas di 400 hende pa dia cu ta test positivo pa Covid19.

Tabata dia 20 di December cu gobierno oficialmente a anuncia cu Omicron a haci su entrada na Aruba cu 17 caso cu a keda getest via monsters (prueba selectivo). Dos dia despues (12 dia caba for di 22 di December 2021) e cifra diario a subi riba 100 caso pa dia y no a baha mas y 6 dia pasa e cifra a pasa 400 caso pa dia y no a baha mas. Esaki ta mustra cu definitivamente Omicron a domina na Aruba. Dr Yuri Casseres a confirma siman pasa cu e variante Omicron tin 70% di e isla domina!

Ayera Aruba a registra 541 caso positivo nobo di Covid19

Segun resumen di ayera 673 persona a recupera y un total di 541 caso nobo di COVID-19 a keda registra di cual 136 ta no-residente. E cifranan aki ta representa un 'Positivity rate' bou di nos residentenan di 62%. E cantidad di casonan activo di COVID-19 pa awe ta 2991 y cantidad di fayecidonan relaciona cu COVID-19 ta 181. Datos ta ilustra casonan nobo di COVID cu un averahe semanal di 586 caso pa dia y un averahe di 'positivity rate' semanal di 59% pa dia.

Actualmente na Aruba tin 14 persona interna debi na COVID di cual den ICU tin 3 persona y riba piso general tin 11. Na Colombia tin actualmente 3 persona den ICU y ninguno (0) riba piso general.