WILLEMSTAD.- E as picher di selekshon di Kòrsou pero tambe di e ekipo lokal Fenix Softex kende ta Leonella Elizabeth, ta pichando aktualmente na Italia despues di a mira akshon promé ku esei na Spaña. Mundu Deportivo a kòmbersá ku Leonella tokante su desishon i eksperensia ku e ta pasando aden aya na Oropa. E tabata planiá kaba pa picha na Italia e temporada benidero aki pero echo ku e kampeonato italiano skùif i ku aki na Kòrsou nos tabata den ‘lockdown’ kompletu, a dun’é e oportunidat di buska un otro opshon tanten pa por ta mas den ritmo pa una bes e yega Italia.

Dor di hasi uso di su kontaktonan, a pone ku Leonella a yega Spaña. El a splika ku el a keda masha enkantá na e pais. Su trato tabata tremendo i ku for di prinsipio e hendenan tabata hasi lo máksimo pa sòru pa e ta konfortabel. Riba dianan ku no tabatin wega, e hendenan di su ekipo tabata plania kosnan leuk pa hasi. El a keda ku bunita rekuerdo i eksperensia atras. “Nivel di Spaña ta intermedio. Mi ekipo CSB Cambre na Spaña, ta un di e poko ekiponan ku tabatin un coach di picheo. Nos a interkambiá konosementu, ya ku mi tambe a kuminsá traha ku hobensitanan mas yòn pa futuro.

Mi ta hopi inkliná pa sigui ku esaki. Tambe el a yuda mi hopi ku mi kambio”, asina Leonella a splika riba e pregunta si el a siña hopi einan. Durante e kampeonato na Spaña, Leonella a kaba ku marka di 3-1 i un ERA di 1.93 den seis partido. El a tira 49 ponche den 29 inning i a regalá solamente ocho base por bola.  Aktualmente manera ya indiká, Leonella ta na Italia i ta hungando pa e ekipo di Forli. El a splika ku el a haña invitashon di Rossi Francsica, kende tabata su dirigente di selekshon di Reino na 2017.

Parse den pasado ya nan tabatin algun kòmbersashon pero na e momentunan ei e no por a honra e invitashonnan. “Akinan mi ke akomodá mi mes. Tira manera mi sa ku mi por tira, duna lo máksimo durante partidonan pa por dominá i duna bon bataya den playoff pa kontribuí na triunfo di mi ekipo”, asina Leonella a splika tokante su meta na Italia. El a agregá bisando ku e ta spera di por siña i trese un eksperensia agradabel bèk na kas. Despues ku e terminá na Italia, e no tin mas plan pa ku sòftbòl. Su enfoke ta  pa duna mihó prestashon posibel den e  liga italiano. Su intenshon ta si pa regresá Kòrsou pero dependé kon e liga na Italia i ku esun di Kòrsou kana, por bira posibel ku e lo por mira akshon aki tambe na Kòrsou.