WILLEMSTAD./HELLEVOETSLUIS.- Famia di e víktimanan tio i subrino Rimon, konosé e malechornan ku a kaba ku bida di nan ser kerí. Hasta ya kaba polis a pidi nan búskeda internashonal. E krímen aki ku a toka Faichel Rimon (22) i su tio Shurandly (29) a sosodé dos dia di Pasku den Branding na Hellevoetsluis. Famianan dje víktimanan a bisa ku nan sa ken ta tras di e dòbel asesinato aki. Polis sa, i ta buskando tres sospechoso. Ademas a pone un tim konsistiendo di 20 reshèrshi pa solushoná e kaso aki. Segun un miembro di famia, e sospechosonan a buska konfrontashon. Un ora promé ku e tiroteo, e miembro di famia a mira e malechornan pasa dilanti su kas na Branding den Hellevoetsluis. Segun e miembro di famia, e sospechosonan a buska problema i yama e víktimanan afó. Dos dia di Pasku, manera ta kustumber na Kòrsou, famianan ta bini huntu pa selebrá Pasku. Esei tabata dia 26 di desèmber e kaso tambe. E dos víktimanan a bai pafó pa huma, i direpente nan a tende tiru kai. E miembro di famia a mira un tipo ku kapuchon bistí ta kore bai, i tabata keda drei wak patras.

Ora e miembronan di famia a sali pafó, nan a topa e víktimanan drumí na suela. E asesinonan a keda lòs bala den direkshon dje famia ku tabata pafó di kas. E tio di 29 aña a fayesé, i mas lat e subrino. Den hospital un dje miembronan di famia a tuma nota ku el a keda alkansá pa bala, ora el a kore tras dje malechornan. E miembro di famia a bisa ku e konosé tur e hendenan aki. Pasobra nan famia i dje sospechosonan ta bai mesun iglesia. E famianan konosé otro bon. E miembro di famia a bisa ku na hopi okashon a pidi famia dje sospechosonan pa papia ku nan miembro di famia, pa kos no sali for di man. Ademas e sospechosonan ta biba den mesun bario unda e echo a tuma lugá. Segun e famianan no tabatin motibu pa asesiná e tio i subrino. Ademas un di nan tabatin un kompania. Segun e miembro di famia, e sospechosonan lo tabata den outo ta sinta warda e víktimanan sali. Pa medio ku nan lo bandoná pais, a emití un búskeda internashonal pa e hòmbernan.