DALLAS, AP.- Servisio militar ta loke a kambia e hòmber ku a tira i mata sinku polis na Dallas.
Asina su mayornan a bisa, segun un ekstrakto di un entrevista publiká djaluna.
Dalphine Johnson, mama di Micah Johnson, a bisa na e sitio di notisia The Blaze ku desde su yu tabata chikitu e kier a bira polis. Su seis añanan komo reservista den ehérsito, inkluyendo un turno na Afganistan “no tabata loke Micah a pensa ku lo bai ta, pues loke el a pensa ku ehérsito tabata representá”. Segun e abogado ku ta represent’é, Johnson a keda akusá di intimidá un kolega muhé seksualmente miéntras e tabata den ehérsito,
Su tata, James Johnson, a bisa ku lágrima na su kara: “Mi no sa kiko bisa pa por hasi e kos aki mihó. Mi nunka por a pensa ku e kosnan aki lo por pasa”.
Djaweps, e veterano di ehérsito di 25 aña a kuminsá tira agentenan miéntras algun shen persona tabata kongregá pa protestá kontra e asesinatonan na man di polis.
El a heridá por lo ménos nuebe agente i dos sivil.
E hefe di polis di Dallas, David Brown, a indiká djaluna ku Johnson a muri na e segundo piso di Sentro College, i no riba un tereno di parker manera outoridatnan a bisa anteriormente.
E agentenan a manda un robòt ku bòm ku tabata wòrdu kontrolá for di un distansia. Brown no a duna mas detaye, manera por ehèmpel e lugá kaminda e negosiashonnan a tuma lugá, algu promé ku a manda e robot-bòm.
Outoridatnan a bisa ku e asaltante, kende tabata kolo skur, a plania un asalto riba un eskala mas grandi i tabatin material eksplosivo sufisiente pa kousa mas daño. Ademas, e tabatin un diario di táktika di kombate i a akumulá un arsenal importante den su kas, kaminda tin materialnan pa fabriká bòm.
