SANA, YEMEN, AP.- Dronenan merikano a mata tres supuesto miembro di Al Qaeda den provinsia di Bayda, na sùitwèst di Yemen, segun funshonarionan di seguridat.

Den e dos atakenan aki di djasabra, Abu Anis al-Abi, komandante di e kampo di e grupo a fayesé huntu ku dos persona mas.

E atake di avionnan no tripulá merikano kontra ophetivonan al-Qaeda ta un medida di represaya for di  atakenan di 11 sèptèmber 2001 na New York i Washington. Esnan di djasabra ta e promé atakenan konosí for di momentu ku  Donald Trump a remplasá Barack Obama den kas Blanku.

Djaweps, funshonarionan di inteligensia merikano a bisa ku durante presidensia di Obama, 117 sivil a fayesé den atakenan ku drone i operashonnan antiterorista na Pakistan, Yemen i otro sitionan.

Diferente grupo di derecho humano i otro aktivistanan ta denunsia ku Obama a duna sifranan muchu ménos ku esnan bèrdat pa loke ta e víktimanan sivil fatal. Ademas di esaki, nan ta teme ku e gobièrnu di Trump ta bira mas agresivo ku e uso di drone, un praktiká ku no ta wòrdu vigilá pa Kongreso òf pa poder hudisial.

Den añanan desde ku e atake di drone a kuminsá, Yemen a kai mas den káos. Esaki a los un guera sivil dos aña pasa na momentu ku rebeldenan Huti di Etnia shiita a konkista e kapital, Sana i a obligá presidente Abed Rabo Mansour Hadi pa hui di e pais. Esaki a kousa un kampaña di bombardeo di parti e koalishon enkabesá pa Saudi Arabia pa purba establesé poder di Hadi.