KABUL, AP.- Un atake den kapital di Afganistan a laga 103 morto i 235 herido, asina e minister afgano di Interior a indiká djadumingu.
Tabatin vários polis entre e mortonan i heridonan, asina minister Wais Ahmad Barmak a indiká.
E agresor tabata manehá un ambulans ku eksplosivo i por a pasa tur kontròl di velosidat bisando ku e tabatin un pashènt ku mester a wòrdu transportá pa hospital. E eksploshon a destruí desena di tienda i vehíkulonan.
Ahmad Fahim, un persona ku a sobrebibí e atake djasabra, a bisa ku vários di e komersiantenan den e zona a muri òf sufri heridanan. El a señalá ku el a mira hopi víktima ku a pèrdè nan brasa i pia den e eksploshon.
Taliban a tuma responsabilidat di e atake, kual tabata un gran gòlpi pa e gobièrnu afgano respaldá pa Merka. Forsanan di seguridat afgano tabatin problema pa kombatí kombatientenan taliban desde ku Merka i NATO a konkluí su mishon di kombate na final di 2014.
E gobièrnu a deklará un dia di luto, kaminda e tiendanan a sera i banderanan tabata hisa na mitar.
E eksploshon potente a wòrdu sintí den e siudat kompleto i a laga e zona afektá i kubrí ku polvo i huma. E atake a yega un siman despues ku milisianonan taliban a ataká un hotèl luhoso di Kabul, kaminda 22 persona a muri, inkluyendo 14 estranhero, i a libra un bataya di 13 ora ku forsa di seguridat.
