WASHINGTON, AFP.- Presidente merikano Joe Biden ta kondená e intento di asesinato ku dron eksplosivo kontra promé minister di Irak Mustafa al Kazimi, i a bisa ku su gobièrnu lo yuda forsanan di seguridat irakí pa identifiká esnan responsabel.

“Mi ta kondená firmemente e atake terorista kontra e kas di promé minister irakí al Kazimi”, asina Biden a bisa den un komunikado.

“Mi ta aliviá pa sa ku promé minister no a resultá heridá i mi ta elogiá e liderazgo ku el a mustra pa pidi e pueblo keda kalmu, moderashon i dialogá pa protehá e institushonnan di estado i fortalesé e demokrasia ku e irakínan tantu meresé”.

Kazimi a skapa ileso despues ku un dron kargá ku eksplosivo a ataká su kas na Baghdad den oranan di mardugá di ayera.

E atake aki a sòru pa un skandal i agitashon promé ku elekshon den e pais. E ofisina di promé minister a deskribí e atake komo un intento frakasá di asesin’é, miéntras ku presidente irakí Barham Salih a kalifik’é komo un intento di gòlpi di estado kontra e sistema konstitushonal.