STOCKHOLM, AP.- Deskonosínan a hòrta un trùk di parti serbes i despues a kore dal esaki kontra un tienda di luho den sentro di Stockholm, matando kuater persona. Asina polis di Stockholm a bisa.
Konseho di kondado di kapital sueko a presisá ku 15 persona mas a resultá heridá, nuebe di nan gravemente. E insidente a wòrdu kalifiká komo un atake terorista pa e promé minister sueko. Polis di Stockholm a bisa ku un persona a wòrdu detené “kende por tin un tipo di konekshon” ku e atake.
E korant sueko Aftonbladet a informá ku un hòmber ku masha poko leshon a wòrdu detené i kende a konfesá di ta tras di e atake ku vehíkulo di karga.
Imágennan transmití bibu na televishon a mustra huma saliendo di tienda Ahlens, den un kaya peatonal Drottinggatan. E trùk usa pa transporte di serbes a dal alrededor di 3’or p.m.
Esnan ku tabata kanando den sentro di siudat a hui pa e pániko. Outoridat a evakuá e stashon sentral di siudat, ku ta uni treinnan regional ku e sistema di meter den e kapital sueko. Tur e treinnan direkshon i for di stashon prinsipal a keda para i dos sentro komersial grandi den e kapital a wòrdu será.
